Afnám Tilviljunar - Abolishing Chance

Hvað gerist þegar tilviljun, ringulreið, hreyfing og hljóð mætast á sviðinu? 

Afnám Tilviljunar er nýtt þverfaglegt verkefni eftir Puruñeka Duo sem sameinar sex ný verk fyrir slagverksdúo, samin af tónskáldum sem öll lærðu við Konunglega tónlistarháskólann í Den Haag. Verkið sækir innblástur í byltingarkennt ljóð eftir Stéphane Mallarmé, Un coup de dés jamais n’abolira le hasard, og kannar heim þar sem ekkert er fullkomlega fastmótað: taktar rekast saman, hljóð umbreytast og hreyfing verður hluti af tónlistinni. Ljóð Mallarmé fer gegn hefðbundnu formi og fagnar óhlutbundnum hugmyndum og margvíslegri túlkun. Við tókum þetta frelsi sem upphafspunkt að skapandi samstarfi sex tónskálda, tveggja danshöfunda, dansara og tónlistarmanna. Með óhefðbundnum hljóðfærum, útvíkkuðum leikaðferðum, nýjum hljóðheimum og samspili tónlistar og hreyfingar skapar hvert tónskáld sinn eigin tónlistarheim, en öll verkin tengjast sameiginlegri heillun af tilviljun og ófyrirsjáanleika. Abolishing Chance gengur lengra en hefðbundin slagverksdúó: þetta er samruni tónlistar, hreyfingar og hljóðs þar sem hver gjörningur getur tekið óvænta stefnu.