Velkomin heim | María Sól Ingólfsdóttir

María Sól Ingólfsdóttir, sópransöngkona, kemur fram í tónleikaröðinni Velkomin heim sunnudaginn 26. júlí klukkan 16. Tónleikaröðin er á vegum FÍT - klassískrar deildar FÍH í samstarfi við Hörpu. Meðleikari er Sævar Helgi Jóhannesson.
Tónleikarnir fara fram í Hörpuhorni, annarri hæð Hörpu. Aðgangur er ókeypis og öll hjartanlega velkomin.
---
María Sól Ingólfsdóttir lauk nýverið meistaraprófi í söng frá Hochschule für Musik Saar en áður hafði hún lokið bakkalárgráðu í söng frá Listaháskóla Íslands árið 2019 og framhaldsstigsprófi frá Söngskólanum í Reykjavík árið 2016. Hún hefur einnig seinustu ár verið nemandi Haus of Shmizzay í New York.
María Sól hefur komið fram í fjölmörgum tónleikum, óperuuppfærslum og tónlistarhátíðum á Íslandi. Hún hlaut Grímuverðlaunin sem söngvari ársins árið 2021 á Íslensku sviðslistaverðlaununum fyrir hlutverk sitt í verkinu Ekkert er sorglegra en manneskjan eftir Adolf Smára Unnarsson og Friðrik Margrétar-Guðmundsson og einnig verðlaun úr styrktarsjóði Halldórs Hansen fyrir framúrskarandi tónlistarnema árið 2019.
María Sól er virkur þátttakandi í menningarlífi Saarlands í Þýskalandi þar sem hún hefur verið búsett seinustu ár. Hún hefur sungið á öllum helstu tónlistarhátíðum í og við Saarbrücken, sem og við óperuna í Saarländische Staatstheater, og var þar að auki valin fulltrúi Richard Wagner-félagsins í Saarlandi á Bayreuth Festspiele-óperuhátíðina árið 2024.
Meðal verkefna framundan er flutningur á Gurrelieder eftir A. Schönberg í Schönberg Center í Vín í sumar, tónleikar á tónlistarhátíðinni Musikfestspiele Saar í Schengen og hlutverk Konstanze í Brottnáminu úr kvennabúrinu eftir W.A. Mozart í Bad Orb.
María Sól Ingólfsdóttir heillar með kraftmikilli rödd og töfrandi framkomu. Hún trúir því að tónlist sé galdur.