Rýnt í verk Valgerðar Briem með Brynju Sveinsdóttur

Verið hjartanlega velkomin á leiðsögn um sýninguna Valgerður með Brynju Sveinsdóttur safnstjóra Gerðarsafns klukkan 15:00 sunnudaginn 11. október.

Í leiðsögninni mun Brynja fjalla um lykilverk Valgerðar og gefa gestum betri innsýn inn í vinnuferil Valgerðar og tilurð verkanna.

Nánar um sýninguna:

Valgerður Briem (1914–2002) var myndlistarkona, kennari og frumkvöðull á sviði myndmenntar. Ævistarf hennar mótaðist í samspili eigin listsköpunar og kennslu, þar sem form, litir, efni og sjónræn hugsun urðu að leiðarljósi. Valgerður steig fyrst fram opinberlega sem myndlistarmaður á Haustsýningu Félags íslenskra myndlistarmanna árið 1980, þá 66 ára. Að baki þeirrar stundar lágu áratugir af einbeittri vinnu: teikningar, vatnslitir, vaxmyndir, skissur, letur og mynstur. Þegar fjölskylda Valgerðar færði Gerðarsafni um 1.640 verk á pappír árið 2006 varð umfang þessa ævistarfs fyrst fyllilega sýnilegt.

Gerðarsafn hlaut tveggja ára rannsóknarstyrk frá Safnasjóði til heildstæðrar frumrannsóknar á ævistarfi Valgerðar Briem, leidda af Cecilie Gaihede. Rannsóknin samtvinnar listfræðilega könnun á listsköpun hennar og miðlun í sýningu og útgáfu bókarinnar Myndvit - Arfleifð Valgerðar Briem, með fræðigreinum um listsköpun, kennslu og nálgun Valgerðar.