Upprásin | Spouses, Brenninetla, ÞESAL

Á þessum tónleikum koma fram Spouses, Brenninetla og ÞESAL.

Harpa, í samstarfi við Tónlistarborgina Reykjavík og Rás 2, stendur fyrir Upprásinni, tónleikaröð sem tileinkuð er grasrót íslenskrar tónlistar, þvert á tónlistarstefnur.

Upprásin fer nú fram fjórða árið í röð og munu samtals 27 hljómsveitir koma fram, þrjár á hverju tónleikakvöldi. Tónleikaröðin er liður í því að framfylgja dagskrárstefnu Hörpu um bætt aðgengi grasrótar og ungs fólks í öllum tónlistargreinum og auka við fjölbreytni. Markmiðið er einnig að tónlistaráhugafólk geti gengið að því vísu að heyra fjölbreytta nýja íslenska tónlist, beint úr grasrót tónlistarlífsins, flutta við kjöraðstæður í tónlistarhúsi þjóðarinnar. Miðaverð er aðeins 2000 kr. en hægt er að leggja til hærri upphæð í miðasöluferlinu sem rennur beint til listafólksins.

**

Spouses er tónlistarverkefni kanadíska tónlistarmannsins Joel Durksen en hann hefur verið búsettur á Íslandi frá 2023. Hann sendi frá sér sína fyrstu breiðskífu, I Could Be Your Dog, í maí 2026 en platan var tekin upp í gömlu hesthúsi sem Joel Durksen hefur umbreytt í hljóðver. Áður en Joel flutti til Íslands hafði hann starfað með tónlistarfólki svo sem með Brad Stank, Dent May og Two Blinks I Love You. Undanfarin ár hefur hann einbeitt sér að eigin lagasmíðum.

**

Brenninetla er djasstríó skipað Kjartani Huga á saxófón, Stígi Grendal á gítar og bassa og Hinriki Torfa á trommur. Hljómsveitin byrjaði sem spunadúó hjá Kjartani og Hinriki, en þegar þeir fengu Stíg með í verkefnið þróaðist hljómsveitin í kraftmikið tríó sem vinnur með allskonar hugmyndir. Tónlist sveitarinnar byggir á djassi og frjálsum spuna en sækir líka áhrif í alls kyns aðrar áttir. Tríóið leggur upp úr samstarfinu og leyfir tónlistinni að þróast náttúrulega í augnablikinu svo engir tónleikar verði eins. Brenninetla lenti í 2. sæti á Músíktilraunum 2026, þar sem sveitin vakti athygli fyrir spunadrifinn og kraftmikinn flutning. Þar hlaut Stígur Grendal einnig verðlaun sem besti gítarleikari keppninnar.

**

Poppbandið ÞESAL er ekki hefðbundin hljómsveit heldur upplifun sem minnir á sýrutripp. Það er teiknimyndageimveran Marens sem stýrir ferðinni með geimskipinu sínu og handteiknuðu myndefni. Bandið sérhæfir sig í grípandi hljómheimum, húmorískum textasmíðum og rafmagnaðri sviðsorku enda er bandið skipað þremur prófessional partýljónum sem eru ófeimin við að blanda saman tónlist, early 2000s teiknimyndastíl og dansstemmningu í eina risastóra kjarnorkupartýsprengju. ÞESAL skipa Ómar Vídó, Kata Backmann og Guðmundur Elí.